chuTkī kaaTo zarā hilāo mujhe

maiñ yahīñ huuñ yaqīñ dilāo mujhe

roz ik jhiil raah taktī hai

khīñch letā hai ik alaav mujhe

jannatī huuñ to phir baḌho aage

titliyoñ aao gudgudāo mujhe

maiñ huuñ dariyā so karnā paḌtā hai

kahīñ rasta kahīñ kaTāo mujhe

apnī raftār kho chukā huuñ maiñ

kitnā mahñgā paḌā paḌāv mujhe

maiñ kināra huuñ aur aarzī huuñ

jaane kab kaaT de bahāo mujhe

maiñ huuñ āḳhir ko jins-e-ḳhām 'azbar'

bech do kauḌiyoñ ke bhaav mujhe