tūfāñ nahīñ guzre ki bayābāñ nahīñ guzre
ham marhala-e-zīst se āsāñ nahīñ guzre
kuchh aise maqāmāt bhī the rāh-e-vafā meñ
mahsūs ye hotā thā ki insāñ nahīñ guzre
arsa huā vo zulf-e-pareshāñ nahīñ dekhī
muddat huī nazroñ se gulistāñ nahīñ guzre
har hādisa-e-nau se ulajhte ga.e har gaam
ham rahguzar-e-shauq se guzarāñ nahīñ guzre
hairān to guzre haiñ zamāne kī ravish se
ye apnī ravish thī ki pareshāñ nahīñ guzre
kyā ham ko satā.egā ġham-e-gardish-e-daurāñ
ham tujh se abhī ai ġham-e-jānāñ nahīñ guzre