kaisā ġhazab ye ai dil-e-pur-josh kar diyā

terī ravish ne un ko jafā-kosh kar diyā

us chashm-e-pur-ḳhumār kī sar-mastiyāñ na pūchh

sab ko ba-qadr-e-hausla mai-nosh kar diyā

majbūr ho chukī thī zabāñ arz-e-hāl par

lekin tirī nigāh ne ḳhāmosh kar diyā

un kī jafāoñ par bhī vafā kā huā gumāñ

apnī vafāoñ ko bhī farāmosh kar diyā

qurbān us nigāh ke jis ne 'hamīd' ko

sad-mahshar-e-ḳhayāl dar-āġhosh kar diyā