pāyāb mauj uTThī to sar se guzar ga.ī
ik sarv-qad javān kī dastār utar ga.ī
karne lagā thā ġharq samundar jahān ko
tūfāñ hī maujzan thā jahāñ tak nazar ga.ī
us tīrgī meñ barq kī shoḳhī ajiib thī
ābād vo huā jise vīrān kar ga.ī
so.e badan ke bahr meñ jaagī thī ḳhuuñ kī lahr
jab chaḌh ke sar tak aa.ī to jaane kidhar ga.ī
sehn-e-chaman meñ dil ke lahū kī har ek buuñd
patte ko phuul shāḳh ko talvār kar ga.ī
nāseh ne kū-e-yār kā rasta bhulā diyā
achchhā huā ki hasrat-e-dīdār mar ga.ī