manzaroñ kī bhiiḌ aisī to kabhī dekhī na thī
gaañv achchhā thā magar us meñ koī laḌkī na thī
ruuh ke andar ḳhalā hai ye mujhe ma.alūm thā
khokhlā hai jism bhī is kī ḳhabar pahuñchī na thī
haath thāmā hai sadā ke vāste vaise magar
saath us kā chhoḌne meñ kuchh burā.ī bhī na thī
un dinoñ bhī dard kā saaya mire ham-rāh thā
jab dhuāñ ban kar vo mere zehn par chhā.ī na thī
jazb ho jaane kā qissa ḳhud se bhī mansūb kar
bhuul merī thī agar tū bhī koī devī na thī
rañg pakkā ho chalā thā yaad aatā hai magar
dhuup mere jism par tab Thiik se bhīgī na thī
ḳhvāhishoñ kā vo jazīra bhī to āḳhir bah gayā
ḳhauf-o-ḳhatra kī jahāñ par koī ābādī na thī