dard-e-ulfat ke bayāñ kī na zarūrat hogī

mere chehre se ayaañ dil kī haqīqat hogī

kaun fariyād karegā kise jur.at hogī

hashr meñ pesh-e-nazar jab tirī sūrat hogī

dāstān-e-shab-e-hijrāñ kī karūñ kyā tashrīh

muḳhtasar bhī jo kahūñgā to tavālat hogī

pesh-e-dāvar to karūñ ḳhuun kā da.avā lekin

mere qātil ko sar-e-hashr nadāmat hogī

dard-e-hijrāñ ke bayāñ kī nahīñ mujh ko hājat

un pe zāhir dil-e-betāb kī hālat hogī

is liye un ke qadam baḌh nahīñ sakte aage

rahguzar meñ kisī nāshād kī turbat hogī

dāġh-e-ulfat haiñ vahī phuul ki rafta rafta

jin se kāshāna-e-dil kī mire zīnat hogī

zindagī qalb kī harakat hī se vābasta hai

dil jo Thahregā to ik aur qayāmat hogī