pahle to dard-e-dil kā ḳhulāsa kare koī

tab un se sharh-e-hāl-e-tamannā kare koī

dard-e-jigar kā pahle mudāvā kare koī

jab tū masīh hone kā da.avā kare koī

mumkin nahīñ ki safha-e-hastī pe mil sake

mere nishān-e-qabr ko DhūñDhā kare koī

badle na karvaTeñ bhī koī farsh-e-ḳhvāb par

ġham se taḌap taḌap ke saverā kare koī

sunñā hai dard-e-dil kī mire dāstāñ agar

patthar kā pahle apnā kaleja kare koī

shām-e-shab-e-firāq hai tākīd-e-zabt-e-āh

dil meñ uThe jo dard to phir kyā kare koī

ḳhāmosh is tarah se hue sakinān-e-qabr

dete nahīñ javāb pukārā kare koī

'sho.ala' muhāl hai ki baḌhe dil kī raushnī

jab tak ḳhayāl-e-dost na paidā kare koī