pyārā sā ḳhvāb niiñd ko chhū kar guzar gayā
māyūsiyoñ kā zahr gale meñ utar gayā
āñkhoñ ko kyā chhalakne se rokā ġhazab huā
lagtā hai saarā jism hī ashkoñ se bhar gayā
dekhe tah-e-charāġh ghanī zulmatoñ ke daaġh
aur maiñ fuzūn-e-kaif-o-masarrat se Dar gayā
tanhā.iyāñ hī shauq se phir ham-safar huiiñ
jab nashsha-e-junūn-e-rifāqat utar gayā
kūche se bhī jo apne guzartā na thā kabhī
kyā soch kar uThā thā ki jaañ se guzar gayā
māmūlī hai ki sub.h jalātā huuñ ḳhud ko maiñ
hotā ye hai ki roz sar-e-shām mar gayā
ab jis ko jo samajhnā ho samjhā kare to kyā
'rāshid' tirā sukūt ajab kaam kar gayā