ḳhunuk-joshī na karte juuñ sabā gar ye butāñ ham se
to misl-e-ġhuncha-e-gul dil na jaatā rā.egāñ ham se
phire us zulf-o-rū ke ishq meñ donoñ-jahāñ ham se
udhar kuffār phir ga.e sab idhar īmāniyāñ ham se
adū the maalī aur sayyād gulchīñ ne qayāmat kī
ḳhudā la.anat kare tīnoñ pe chhūTā gulistāñ ham se
ujāḌā girya-e-shor-e-junūñ ke vāste ham ko
vale gulshan ko aur āb-o-namak thā bāġhbāñ ham se
hameñ to rāstī joñ tiir hargiz raas aa.ī niiñ
hamesha TeḌhe hī rahte haiñ ye abrū-kamāñ ham se
aqab yāroñ ke sar par ḳhaak karte ham bhī jaate haiñ
rahā jaatā nahīñ joñ gard-e-rāh-e-kārvāñ ham se
hameñ tiflāñ to pattharoñ kī mohabbat se na bhūleñge
chale sahrā ko ham phir ga.e balā se shahriyāñ ham se
hamīñ Tuk zab.h kar le sāya-e-gulbun meñ jiitā rah
chhuḌāyā tū ne gar sayyād gul kā āstāñ ham se
maze meñ dard-e-sar ke kab se mohtāj-e-davā 'uzlat'
abas ai sandalī-rañgo hue ho sargirāñ ham se