shafaq kā nuur bhī rah rañg-e-āftāb meñ aa

nazar bachā ke kabhī vādī-e-gulāb meñ aa

varaq varaq na pareshān rah havāoñ meñ

hurūf-e-arz-e-tamannā hai to kitāb meñ aa

chamakte zarroñ meñ bahtā huā samundar hai

hai tujh ko shauq-e-tajassus to phir sarāb meñ aa

ḳhutūt hī ke vasīle se maiñ paḌhūñ tujh ko

kabhī savāl kī sūrat kabhī javāb meñ aa

mire gunāh meñ shāmil rahā hai tū bhī 'asad'

nibhāne ahd-e-vafā ab mire azaab meñ aa