kuchh aur pilā nashāt kī mai
ye lazzat-e-jism hai ajab shai
ab bhī vahī giit hai vahī lai
ham vo nahīñ anjuman vahī hai
taḳhayyul meñ har talab hai tahsīl
jo baat kahīñ nahīñ yahāñ hai
karte tirā intizār abad tak
lekin tirā e'tibār tā-kai
mujh ko to na raas aa.ī duurī
tujh meñ bhī vo baat ab nahīñ hai
dīvāngiyāñ kabhī miTī haiñ
har-chand rahā zamāna darpai
samjhā.eñ 'ziyā' magar unheñ kyā
dil hī se na baat ho sakī tai