dil ke kāġhaz par likhā hai terā naam
chain miltā hai paḌhūñ jab sub.h-o-shām
kyā ḳhabar thī ishq bhī ik rog hai
varna kāfir dil ko de detī lagām
zindagī bhar zindagī kab kar sakī
zindagī mere liye thī jaise laam
sar pe saudā-e-junūñ jab ho savār
sūjhtā aise meñ phir kyā koī kaam
honī anhonī nahīñ hotī kabhī
honī hotī hai bahut hī be-lagām
barkateñ harakat meñ muzmar haiñ bahut
karte rahnā chāhiye insāñ ko kaam
ai 'munavār' dil ko qaabū meñ rakho
rah na pāogī vagarna nek naam