vaqt jab karvaTeñ badaltā hai
fitna-e-hashr saath chaltā hai
mauj-e-ġham se hī dil bahaltā hai
ye charāġh āñdhiyoñ meñ jaltā hai
us ko tūfāñ Dubo nahīñ saktā
jo kināroñ se bach ke chaltā hai
kis ko mālūm hai junūn-e-hayāt
sāya-e-āgahī meñ paltā hai
un kī mahfil meñ chal ba-hosh-e-tamām
kaun gir kar yahāñ sambhaltā hai
maiñ karūñ kyuuñ na us kī qadr 'anvar'
dil ke sāñche meñ ashk Dhaltā hai