bujhne de sab diye mujhe tanhā.ī chāhiye
kuchh der ke liye mujhe tanhā.ī chāhiye
kuchh ġham kashīd karne haiñ apne vajūd se
jā ġham ke sāthiye mujhe tanhā.ī chāhiye
uktā gayā huuñ ḳhud se agar maiñ to kyā huā
ye bhī to dekhiye mujhe tanhā.ī chāhiye
ik roz ḳhud se milnā hai apne ḳhumār meñ
ik shaam bin piye mujhe tanhā.ī chāhiye
takrār is meñ kyā hai agar kah rahā huuñ maiñ
tanhā.ī chāhiye mujhe tanhā.ī chāhiye
duniyā se kuchh nahīñ hai sarokār ab mujhe
be-shak mire liye mujhe tanhā.ī chāhiye