dīvār pe rakkhā to sitāre se uThāyā
dil bujhne lagā thā so nazāre se uThāyā
be-jān paḌā dekhtā rahtā thā maiñ us ko
ik roz mujhe us ne ishāre se uThāyā
ik lahr mujhe khīñch ke le aa.ī bhañvar meñ
vo lahar jise maiñ ne kināre se uThāyā
ghar meñ kahīñ gunjā.ish-e-dar hī nahīñ rakkhī
buniyād ko kis shak ke sahāre se uThāyā
ik maiñ hī thā ai jins-e-mohabbat tujhe arzāñ
aur maiñ ne bhī ab haath ḳhasāre se uThāyā