ḳhaak chhānī na kisī dasht meñ vahshat kī hai

maiñ ne ik shaḳhs se ujrat pe mohabbat kī hai

ḳhud ko dhutkār diyā maiñ ne to is duniyā ne

merī auqāt se baḌh kar mirī izzat kī hai

jī meñ aatā hai mirī mujh se mulāqāt na ho

baat milne kī nahīñ baat tabī.at kī hai

ab bhī thoḌī sī mire dil meñ paḌī hai shāyad

zard sī dhuup jo dīvār se ruḳhsat kī hai

aaj jī bhar ke tujhe dekhā to mahsūs huā

aañkh ne sūra-e-yūsuf kī tilāvat kī hai

haal pūchhā hai mirā poñchhe haiñ aañsū mere

shukriya tum ne mire dard meñ shirkat kī hai