bas ek jism ek hī qad meñ paḌā rahūñ

behad huuñ maiñ to kyuuñ kisī had meñ paḌā rahūñ

sub.h-e-azal hai kab se mire intizār meñ

jī chāhtā hai tāq-e-abad meñ paḌā rahūñ

ik roz tañg aa ke mujhe sochnā paḌā

kab tak maiñ apnī sohbat-e-bad meñ paḌā rahūñ

aage nikaltā jaatā huuñ maiñ apne-āp se

ab dar-guzar karūñ ki hasad meñ paḌā rahūñ

be-sūd ho gayā huuñ to hāsil kahāñ gayā

ai asal zar maiñ kaun sī mad meñ paḌā rahūñ