manziloñ tak manziloñ kī aarzū rah jā.egī
kārvāñ thak jaa.eñ phir bhī justujū rah jā.egī
ai dil-e-nādāñ tujhe bhī chāhiye pās-e-adab
vo jo rūThe to adhūrī guftugū rah jā.egī
ġhair ke aane na aane se bhalā kyā fā.eda
tum jo aa jaao to merī aabrū rah jā.egī
is bharī mahfil meñ terī ek maiñ hī tishna-lab
sāqiyā kyā ḳhvāhish-e-jām-o-subū rah jā.egī
ham agar mahrūm hoñge ahl-e-fan kī daad se
sher kahne kī kise phir aarzū rah jā.egī