jab muñDeroñ pe parindoñ kī kumak jaarī thī
lafz the lafzoñ meñ ehsās kī sardārī thī
ab jo lauTā huuñ to pahchān nahīñ hotī hai
kahāñ dīvār thī dīvār meñ almārī thī
vo havelī bhī sahelī thī pahelī jaisī
jis kī īñToñ meñ mire ḳhvāb the ḳhuddārī thī
āḳhirī baar maiñ kab us se milā yaad nahīñ
bas yahī yaad hai ik shaam bahut bhārī thī
pūchhtā phirtā huuñ galiyoñ meñ koī hai koī hai
ye vo galiyāñ haiñ jahāñ log the sarshārī thī
peḌ the chand makānoñ meñ zamānoñ jaise
jin kī chhāñv meñ mirī ruuh kī lū jaarī thī
kyā bhale din the hameñ khel thā hañsnā ronā
saañs lenā bhī hameñ jaise adākārī thī
bas koī ḳhvāb thā aur ḳhvāb ke pas-manzar meñ
baaġh thā phuul the ḳhushbū kī numūdārī thī
ham ne dekhā thā use ujle dinoñ meñ 'hammād'
jin dinoñ niind thī aur niind meñ bedārī thī