baḌhā hai soz-e-jigar ab madad ko aa.e koī
ġhazab kī aag lagī hai zarā bujhā.e koī
paḌī hai dil ko mire ḳhud bhī ādat-e-fariyād
ye chheḌtā hai har ik ko ki phir satā.e koī
sunā.e jaate haiñ ham qissa-e-ġham-e-furqat
ḳhudā kare ki na mahfil meñ muskurā.e koī
taḌap vo hijr kī thī ab ye maut kī hai taḌap
jo dekhnā ho to ab aa ke dekh jaa.e koī
jinheñ ye dekh ke taab aatī hai vo aur haiñ log
ham apne muñh ko phirāte haiñ muskurā.e koī