yaad meñ apne yār-e-jānī kī
ham ne mar mar ke zindagānī kī
dostoñ ko adū kiyā ham ne
kar ke tārīf yār-e-jānī kī
kyuuñ na rusvā kare zamāne meñ
ye kahānī ġham-e-nihānī kī
ruuh huegī hashr meñ sāhab
ik nishānī sarā-e-fānī kī
ḳhāksārī se baḌh gayā insāñ
arz par sair āsmānī kī
zard sūrat pe hijr meñ na hañso
sharh hai rañg-e-zāfrānī kī
aaj kal lucknow meñ ai 'aḳhtar'
dhuum hai terī ḳhush-bayānī kī