sochtā huuñ ki vo kaisā hogā
ā.īna hogā ki chehrā hogā
jab khulī hotī tire dosh pe zulf
abr bhī TuuT ke barsā hogā
jis ke jalvoñ kī koī had hī nahīñ
maiñ ne kitnā use chāhā hogā
log firdaus jise kahte haiñ
is zamīñ kā koī TukḌā hogā
jaam kyoñ haath se gir jaatā hai
mai-kade meñ koī pyāsā hogā
mahfileñ kartī haiñ ḳhud us kā tavāf
kaun kahtā hai vo tanhā hogā
us kī mahfil meñ chale ho to 'ziyā'
dīda-o-dil pe bhī pahra hogā