ho ga.ī aam mohabbat kī kahānī kitnī
ḳhaak logoñ ne tire shahr kī chhānī kitnī
tum nahīñ the to khaTakte the in āñkhoñ meñ charāġh
tū jo aa.e to huī raat suhānī kitnī
ik mohabbat ke havāle se sunī haiñ ham ne
dāstāneñ tirī āñkhoñ kī zabānī kitnī
bārhā silsila-e-ahd-e-bahārāñ ke huzūr
ġhuncha-o-gul pe huī fātiha-ḳhvānī kitnī
aa.e vo aur ga.e dil meñ charāġhāñ kar ke
ek lamhe meñ huī baat purānī kitnī