fareboñ se na bahlegā dil-e-āshufta-kām apnā

ba-zāhir muskurā kar dekhne vaale salām apnā

kisī kī bazm ke hālāt ne samjhā diyā mujh ko

ki jab saaqī nahīñ apnā to mai apnī na jaam apnā

agar apne dil-e-betāb ko samjhā liyā maiñ ne

to ye kāfir nigāheñ kar sakeñgī intizām apnā

mukammal kar gayā jal kar hayāt-e-ġham ko parvāna

aur ik ham the ki afsāna bhī chhoḌā nā-tamām apnā

jahān-e-ishq meñ aise maqāmoñ se bhī guzrā huuñ

ki bāz-auqāt ḳhud karnā paḌā hai ehtirām apnā

maiñ dīvāna sahī lekin vo ḳhush-qismat huuñ ai 'mahshar'

ki duniyā kī zabāñ par aa gayā hai aaj naam apnā