niiñd kī āñkh-mīcholī se mazā lete haiñ
pheñk dete haiñ kitāboñ ko uThā lete haiñ
bhūla-bhaTkā sā musāfir koī shāyad mil jaa.e
do qadam chalte haiñ āvāz lagā lete haiñ
abr ke TukḌoñ meñ ḳhurshīd ghirā ho jaise
kahīñ kahte haiñ kahīñ baat chhupā lete haiñ
āñdhiyāñ tez chaleñgī to añdherā hogā
ḳhud bhī aise meñ charāġhoñ ko bujhā lete haiñ
varaq-e-zīst ko rakhnā bhī hai saada 'mahshar'
hāl-e-ġham likhte haiñ aur ashk bahā lete haiñ