sar jazīroñ ke phir se ubharne lage

vo jo paanī chaḌhe the utarne lage

ab kisī dost se koī shikva nahīñ

vaqt ke saath sab zaḳhm bharne lage

ham ne maazī meñ Thukrā.ī haiñ manzileñ

rāste meñ kahāñ ham Thaharne lage

mauj-dar-mauj ḳhushkī thī pesh-e-nazar

shor andar ke dariyā bhī karne lage

aise kyā jurm sarzad hue arz par

log apne hī saa.e se Darne lage

aaj phir aap lāġhar haiñ sūraj miyāñ

dhuup meñ log phir se ThiThurne lage

kaun se mansaboñ kī mohabbat meñ ham

apne mansab se nīche utarne lage

tum ne sahrā meñ chhoḌe the jo naqsh-e-pā

aaj vo āñdhiyoñ meñ bikharne lage