jo sañg ho ke mulā.em hai sādgī kī tarah

pighal rahā hai mire dil meñ chāñdnī kī tarah

mujhe pukāro to dīvār huuñ suno to sadā

maiñ gūñjtā huuñ fazāoñ meñ ḳhāmushī kī tarah

maiñ us ko nuur kā paikar kahūñ ki jān-e-ḳhayāl

jo mere dil pe utartā hai shā.irī kī tarah

kisī kī yaad ne mahkā diyā hai zaḳhm-e-talab

sabā ke haath se maslī huī kalī kī tarah

thakā huā huuñ kisī saa.e kī talāsh meñ huuñ

bichhaḌ gayā huuñ sitāroñ se raushnī kī tarah

maiñ apne karb meñ ġhaltāñ vo apne kaif meñ gum

hai is kī jiit bhī merī shikast hī kī tarah

ḳhizāñ ke zahr kā tiryāk agar nahīñ yaaro

guloñ kī baat hai be-vaqt rāgnī kī tarah