guftugū meñ zahr hai aur lahja pur-taz.hīk hai

tum ḳhudā-lagtī kaho kyā ye ravayya Thiik hai

aañkh bhar ke ek muddat se jise dekhā nahīñ

vo sitamgar kis qadar dil se mire nazdīk hai

ek ġham qismat ne jaise dhar diyā qirtās par

zindagī jiinā bhī jaise sānvī tahrīk hai

phir hañsī kī ik kiran se ashk raushan ho ga.e

aag paanī meñ lagāne kī yahī taknīk hai

kal phir us ke naam par ik aur patthar rakh diyā

ham gadāgar bhī nahīñ haiñ na mohabbat bhiik hai

ik havā aisī chalī jo aks dhuñdlā kar ga.ī

baal shīshe par jo utrā baal se bārīk hai

jo pas-e-dīvār hai vo bā.is-e-hairat nahīñ

sāmne hai jo tamāshā sūrat-e-tashkīk hai