raḳht-e-gurez gaam se aage kī baat hai
duniyā, faqat qayām se aage kī baat hai
tū rāste bichhā na charāġhoñ se lau tarāsh
ye ishq ehtimām se aage kī baat hai
in pattharoñ ke saath kabhī rah ke dekhiye
ye ḳhāmushī kalām se aage kī baat hai
maiñ ne adū ke ḳheme meñ bhejā hai ik charāġh
ye ain intiqām se aage kī baat hai
tū āb-o-gil se jism banā, ism mat sikhā
'bābar' ye tere kaam se aage kī baat hai