do umroñ kī ruī dhun kar aayā huuñ
maiñ pardes se ḳhud ko bun kar aayā huuñ
dariyā se yaarī bhī kitnī mushkil hai
maiñ kashtī ke TukḌe chun kar aayā huuñ
tum ko kitnā shauq hai phone pe bātoñ kā
aaj bhī boss kī bāteñ sun kar aayā huuñ
jaane kaun churā letā thā merā vaqt
wall-clock pe jaalā ban kar aayā huuñ
aaj kī shaam guzāreñge ham chhatrī meñ
bārish hogī ḳhabreñ sun kar aayā huuñ
dost ko samjhāne kī ḳhātir aayā thā
anjāne meñ ḳhud ko Tun kar aayā huuñ