ġhamoñ kī bhiiḌ meñ rasta banā ke chaltā huuñ
alī kī aal huuñ maiñ sar uThā ke chaltā huuñ
zarā sambhal ke mire rāste meñ tum aanā
maiñ apne ghar se lahū aazmā ke chaltā huuñ
ye terā shahr mirī saañs chhīn letā hai
maiñ apne gaañv meñ siina phulā ke chaltā huuñ
jo merī raah meñ patthar girā ke jaatā hai
maiñ us kī raah se patthar haTā ke chaltā huuñ
hamesha ḳhair se pahuñchā huuñ apnī manzil par
safar se pahle maiñ kuchh de dilā ke chaltā huuñ