na-jāne kaun tire kāḳh-o-kū meñ aa.egā
jo aa.egā vo mirī aarzū meñ aa.egā
maiñ jāntā huuñ mire ba.ad mere marqad par
koī ġhubār mirī justujū meñ aa.egā
yahī to soch ke jalte haiñ masjidoñ ke charāġh
darūn-e-shab yahāñ koī vazū meñ aa.egā
tire ḳhayāl kī lau se chamak uThe haiñ hurūf
abhī to tū mire harf-e-numū meñ aa.egā
mujhe ḳhudā se zarā ham-kalām hone do
tumhārā zikr bhī is guftugū meñ aa.egā