baaġh ik din kā hai so raat nahīñ aane kī
vo parī phir se mire haat nahīñ aane kī
ab vo laḌkī nahīñ aane kī mire college meñ
ab ke multān se sauġhāt nahīñ aane kī
tum chalī jaao ye patthar nahīñ pahle jaisā
aañkh se jū-e-munājāt nahīñ aane kī
ab jo ye vasl hai is vasl ko be-kār samajh
ham pe rañgīnī-e-hālāt nahīñ aane kī
dekh lo khol ke khiḌkī ki zarā der haiñ ham
dūsrī baar ye bārāt nahīñ aane kī
ab tire ba.ad faqat aab hī utregā yahāñ
ab ke barsāt meñ barsāt nahīñ aane kī