chehre par ḳhush-hālī le kar aatā huuñ
tum se milne taxi le kar aatā huuñ
yuuñ karnā tum jugnū le kar aa jaanā
maiñ ik dost se kashtī le kar aatā huuñ
raste meñ ik Taapu par kuchh Thahreñge
maiñ bargar aur pepsi le kar aatā huuñ
tum chāho to vāpas jā bhī saktī ho
maiñ gaaḌī kī chābī le kar aatā huuñ
jism kī aag se kab tak kaam chalā.eñge
jañgal se kuchh lakḌī le kar aatā huuñ
maiñ jaatā huuñ to patthar se bahtā hai
jis chashme kā paanī le kar aatā huuñ