ba.ad-e-makīñ makāñ kā gar baam rahā to kyā huā
aap hī jab rahe nahīñ naam rahā to kyā huā
chashm se kyā hai fā.eda dil meñ na ho jo zauq-e-dīd
shīshe meñ mai na jab rahe jaam rahā to kyā huā
ham se ġharīb bhī bhalā mujre ke bāryāb hoñ
izn terā kabhī kabhī aam rahā to kyā huā
ġhair-e-vafā meñ puḳhta haiñ yuuñ hī sahī pa mujh sā bhī
ek tirī janāb meñ ḳhaam rahā to kyā huā
ram to tirā sabhoñ se hai ai but-e-man hiran bhalā
apne 'huzūr' se kabhī raam rahā to kyā huā