nit-na.e rañg meñ nikaltā huuñ
apne ḳhvāboñ ke saath chaltā huuñ
taare apne safar meñ rahte haiñ
aur maiñ apnī raah chaltā huuñ
gumrahī raah ḳhud nikāltī hai
na.e rastoñ pe jab nikaltā huuñ
duur rahtā huuñ shāh-rāhoñ se
aur pagDanDiyoñ pe chaltā huuñ
paañv apne haiñ laġhzisheñ apnī
ḳhud hī girtā huuñ ḳhud sambhaltā huuñ
barf rahtā huuñ sard lamhoñ meñ
dhuup ke saath bah nikaltā huuñ
maiñ hī qaus-e-quzah meñ huuñ 'betāb'
mausamoñ meñ bhī maiñ badaltā huuñ