jaam jab tak na chale ham nahīñ Talne vaale
aaj saaqī tire fiqre nahīñ chalne vaale
naam raushan jo huā husn meñ parvānoñ se
sham.a kahtī hai ki ThanDe raheñ jalne vaale
kyā hukūmat mire saaqī kī hai mai-ḳhāne meñ
jitne sāġhar haiñ ishāre pe haiñ chalne vaale
fitne uTh uTh ke ye kahte haiñ ki o mast-ḳhirām
ham bhī saa.e kī tarah saath haiñ chalne vaale
fā.eda kyā havas-e-dil ke baḌhāne se 'jalīl'
vahī nikleñge jo armāñ haiñ nikalne vaale