ye jo rishta hai merā miTTī se
ruup saarā hai merā miTTī se
sabza kahtā hai luuTe jaao mujhe
dil kushāda hai merā miTTī se
maiñ sitārā nahīñ huuñ sūraj huuñ
gahrā rishta hai merā miTTī se
maiñ to ḳhud-rav daraḳht huuñ lekin
peT bhartā hai merā miTTī se
mutma.in huuñ ki fasl achchhī hai
siina ThanDā hai merā miTTī se
har havelī meñ diip raushan hai
gaañv zinda hai merā miTTī se
jo kahūñgā vo sach kahūñgā 'ḳhalīl'
kyūñki rishta hai merā miTTī se