patte patte se naġhma-sarā kaun hai
ai havā tere andar chhupā kaun hai
phuul shabnam shafaq chāñdnī kahkashāñ
parda-e-husn se jhāñktā kaun hai
maslahat-kosh vo to nahīñ thā magar
nutq ko haath se roktā kaun hai
itne badle hue haiñ ki hairat meñ huuñ
mere pīchhe meñ un se milā kaun hai
nā-umīdī ne mujh ko muvahhid kiyā
ab ḳhudā ke sivā aasrā kaun hai
ye 'tapish' kī anā hai nahīñ to yahāñ
ġham ko hañs hañs ke yuuñ jheltā kaun hai