chehra sālim na nazar hī qaa.em
be-sutūñ sab kī havelī qaa.em
haath se maujoñ ne rakh dī patvār
kaise dhāre pe hai kashtī qaa.em
ziist hai kachche ghaḌe ke mānind
bahte paanī pe hai miTTī qaa.em
saa.e dīvār ke TeḌhe tirchhe
aur dīvār ki sīdhī qaa.em
sab haiñ TuuTī huī qadroñ ke khañDar
kaun hai vaz.a pe apnī qaa.em
ḳhud ko kis sat.h par zinda rakkhūñ
lafz daa.im haiñ na ma.anī qaa.em
hai baḌī baat jo rah jaa.e 'fazā'
sat.h-e-sanjīda-nigāhī qaa.em