maiñ ḳhud huuñ naqd magar sau udhār sar par hai
ajab vabāl-e-ġham-e-rozgār sar par hai
gumāñ hai sab ko ki huuñ āsmāñ uThā.e hue
safar safar vo qadam kā ġhubār sar par hai
havā-e-jāñ kā taqāzā ki rahiye ghar se duur
ki haiñ jo ghar meñ bayābāñ hazār sar par hai
subuk na samjho mujhe pusht TuuT jā.egī
maiñ ek pal sahī sadiyoñ kā baar sar par hai
zamīñ ke zimme hai jo qarz kyuuñ chukā.ūñ maiñ
zamāna kis liye āḳhir savār sar par hai
hazār ghāTe kā saudā ho ye faqīrī-e-harf
yahī bahut hai kulāh-e-vaqār sar par hai
'fazā' na thā kabhī taaza dimāġh itnā maiñ
hai us kā haath ki shāḳh-e-bahār sar par hai