ḳhvāb kyā hai ki TūTtā hī nahīñ
ik nasha hai ki TūTtā hī nahīñ
is ne kyā kyā sitam na toḌe haiñ
dil mirā hai ki TūTtā hī nahīñ
TūTtā jā rahā hai ik ik ḳhvāb
silsila hai ki TūTtā hī nahīñ
rishte naate tamām TuuT ga.e
sar-phirā hai ki TūTtā hī nahīñ
pau phaTī añg añg TūTtā hai
aur nasha hai ki TūTtā hī nahīñ
lahreñ aa aa ke TuuT jaatī haiñ
ik ghaḌā hai ki TūTtā hī nahīñ
dil ke dariyā meñ kaisā sañg girā
dā.era hai ki TūTtā hī nahīñ
naav TuuTī do-nīm hai patvār
hausla hai ki TūTtā hī nahīñ
dhāgā kachchā sahī magar 'arshad'
yuuñ bañdhā hai ki TūTtā hī nahīñ