zehn meñ mere abhī koī kasak baaqī hai
tujh se duurī kī taḌap aaj talak baaqī hai
merī āñkhoñ meñ kahīñ terī chamak baaqī hai
merī bāñhoñ meñ tire tan kī lachak baaqī hai
vo bahāroñ kā ho mausam yā ḳhizāñ kī rut ho
pyaar ke baaġh meñ har gul kī mahak baaqī hai
mere kamre meñ paḌī shīshe kī kirchī meñ bhī
dhundlī dhundlī sī kahīñ terī jhalak baaqī hai
jitnī ruḳhsār kī laalī meñ hai baaqī mere
ishq meñ mere abhī itnī dahak baaqī hai