sach kahāñ kahtā hai jaane vaalā
ḳhuub pachhtā.egā aane vaalā
raat aur din kā tasalsul kyā hai
ek chakkar hai thakāne vaalā
mutma.in hai vo banā kar duniyā
kaun hotā huuñ maiñ Dhāne vaalā
sub.h se khod rahā huuñ ghar ko
ḳhvāb dekhā hai ḳhazāne vaalā
thak gayā thā to zarā ruk jaatā
merī tasvīr banāne vaalā
dil meñ is darja ḳhamoshī kyuuñ hai
kyā huā shor machāne vaalā
sharm se Duub maregā 'alvī'
ḳhush kahāñ hogā satāne vaalā