maiñ apne aap se Darne lagā thā
galī kā shor ghar meñ aa gayā thā
pareshāñ thā khulā darvāza ghar kā
koī khiḌkī pe dastak de rahā thā
use maiñ shahr bhar meñ DhūñDh aayā
mire kamre meñ vo baiThā huā thā
vahāñ ke log bhī kitne ajab the
ajab logoñ meñ ghir ke rah gayā thā
bahut ḳhush ho rahā thā mujh se mil ke
na jaane aaj us ke dil meñ kyā thā
use maiñ ne bhī kal dekhā thā 'alvī'
na.e kapḌe pahan ke jā rahā thā