shagun le kar na kyuuñ ghar se chalā maiñ
tumhāre shahr meñ tanhā phirā maiñ
akelā thā kise āvāz detā
utartī raat se tanhā laḌā maiñ
guzarte vaqt ke pairoñ meñ aayā
saraktī dhuup kā saayā banā maiñ
ḳhalāoñ meñ mujhe pheñkā gayā thā
zamīñ pe reza reza ho gayā maiñ
mire hone ne mujh ko maar Daalā
nahīñ thā to bahut mahfūz thā maiñ
yahāñ to ā.īne hī ā.īne haiñ
mujhe DhūñDo kahāñ par kho gayā maiñ