chāñd kī kagar raushan
shab ke bām-o-dar raushan
ik lakīr bijlī kī
aur rahguzar raushan
uḌte phirte kuchh jugnū
raat idhar udhar raushan
raat kaun aayā thā
kar gayā sahar raushan
phuul qumqumoñ jaise
titliyoñ ke par raushan
laḌkiyoñ se galiyārī
khiḌkiyoñ se ghar raushan
apne-āp ko yā-rab
ab to ham pe kar raushan
maiñ daraḳht andhā huuñ
de mujhe samar raushan
sher mat sunā 'alvī'
dāġh-e-dil na kar raushan