aur bāzār se kyā le jā.ūñ
pahlī bārish kā mazā le jā.ūñ
kuchh to sauġhāt duuñ ghar vāloñ ko
raat āñkhoñ meñ sajā le jā.ūñ
ghar meñ sāmāñ to ho dilchaspī kā
hādisa koī uThā le jā.ūñ
ik diyā der se jaltā hogā
saath thoḌī sī havā le jā.ūñ
kyuuñ bhaTaktā huuñ ġhalat rāhoñ meñ
ḳhvāb meñ us kā pata le jā.ūñ
roz kahtā hai havā kā jhoñkā
aa tujhe duur uḌā le jā.ūñ
aaj phir mujh se kahā dariyā ne
kyā irāda hai bahā le jā.ūñ
ghar se jaatā huuñ to kaam ā.eñge
ek do ashk bachā le jā.ūñ
jeb meñ kuchh to rahegā 'alvī'
laao tum sab kī duā le jā.ūñ