mudda.ā hāsil mirā ho kar rahā
dard-e-dil dil kī davā ho kar rahā
hausla hī aasrā ho kar rahā
koī dar ho ham ko vā ho kar rahā
raas ham ko aa ga.e saare alam
umr kā tai marhala ho kar rahā
la.al ugal kar aag uglā hai sadā
lāla-rū kis kā sagā ho kar rahā
vasl-e-hamdam se rahe mahrūm ham
likkhā tāle.a kā sadā ho kar rahā
sadme har lamha sahe had se sivā
dil kā har ghaav harā ho kar rahā
'hilm' ham ko khā ga.ī dil kī lagī
halkā halkā dard sā ho kar rahā