mire safar meñ hī kyuuñ ye azaab aate haiñ
jidhar bhī jā.ūñ udhar hī sarāb aate haiñ
talāsh hai mujhe ab to unhīñ fazāoñ kī
jahāñ ḳhizāñ meñ bhī akasr gulāb aate haiñ
kisī ko miltā nahīñ ik charāġh mīloñ tak
kisī kī bastī meñ sau āftāb aate haiñ
na niklā kījiye rātoñ ko ghar se aap kabhī
saḌak pe raat meñ ḳhāna-ḳharāb aate haiñ
khulā makān hai har ek zindagī 'āzar'
havā ke saath darīchoñ se ḳhvāb aate haiñ